Հարցեր պատվաստանյութերի մասին

• Արդյո՞ք պետք է հիվանդացած անձի հակամարմինները որոշվեն պատվաստելուց առաջ և հետո։

  Պատվաստվելուց առաջ և հետո հակամարմիններ որոշելու անհրաժեշտություն չկա:

• Արդյո՞ք անհրաժեշտ է պատվաստումից առաջ COVID-19-ի ՊՇՌ թեստ հանձնել:

  COVID-19-ի ՊՇՌ թեստ հանձնելու անհրաժեշտություն չկա: Այս փաստը չի խանգարում պատվաստմանը և օրգանիզմին որևէ վտանգ չի ներկայացնում:

• Արդյո՞ք COVID-19-ի դեմ պատվաստանյութը կարող է առաջացնել կորոնավիրուսային հիվանդություն (COVID-19):

  COVID-19-ի դեմ ներկա պահին կիրառվող պատվաստանյութերից որևէ մեկը չի պարունակում կենդանի վիրուս։ Սա նշանակում է, որ դրանք չեն կարող առաջացնել կորոնավիրուսային հիվանդություն։

• Կորոնավիրուսային հիվանդությունից հետո անհրաժե՞շտ է պատվաստվել, թե՝ ոչ: Եթե այո` ե՞րբ:

  Այո՛, պետք է պատվաստվել, COVID-19-ի հետ կապված առողջական լուրջ ռիսկերի, ինչպես նաև հնարավոր կրկնավարակի պատճառով։ Հիվանդանալուց հետո անձը կարող է պատվաստվել վերջին ախտանշաններն անցնելուց 14 օր հետո: Ներկայումս, դեռևս հայտնի չէ, թե COVID-19-ով հիվանդանալուց և ապաքինվելուց հետո տվյալ անձը որքան ժամանակ է պաշտպանված։

• Արդյո՞ք անհրաժեշտ է պատվաստումից հետո կիրառել անտիկոագուլյանտներ կամ այլ պրեպարատներ:

  Պատվաստումից հետո որևէ դեղորայքի կիրառման անհրաժեշտություն չկա:

• Արդյո՞ք անհրաժեշտ է նախքան պատվաստումն իրականացնել լաբորատոր հետազոտություններ:

  Պատվաստումից առաջ որևէ լաբորատոր հետազոտության կարիք չկա, այդ թվում նաև` կոագուլոգրամմայի, արյան մակարդելիության գործոնների որոշման:

• COVID-19-ի դեմ պատվաստումը արյան դոնորության հակացուցու՞մ է:

  Կորոնավիրուսային հիվանդության դեմ պատվաստված յուրաքանչյուր անձ կարող է դառնալ արյան դոնոր պատվաստումից 7 օր հետո, եթե չունի հետպատվաստումային որևէ կողմնակի երևույթ կամ հիվանդության ախտանիշ:

• Որո՞նք են կորոնավիրուսային հիվանդության (COVID-19) դեմ իրականացվող պատվաստումների բժշկական հակացուցումները:

  Պատվաստումների բժշկական հակացումները լինում են բացարձակ և ժամանակավոր: Պատվաստումների միակ բացարձակ հակացուցումը տվյալ պատվաստանյութի նախորդ դեղաչափից հետո առաջացած անաֆիլաքսիան է կամ ծանր ալերգաբանական ռեակցիան (տարածուն եղնջացան, սուլող շնչառություն, բերանի խոռոչի, կոկորդի այտուց, դժվարացած շնչառություն, հիպոթենզիա և շոկ) պատվաստանյութի կամ պատվաստանյութի որևէ բաղադրիչի նկատմամբ: Պատվաստման ժամանակավոր հակացուցումներն են սուր հիվանդությունները՝ միջին և ծանր ընթացքով, ինչպես նաև քրոնիկ հիվանդությունների սրացումը:

• Ու՞մ կողմից է տրվում կորոնավիրուսային հիվանդության (COVID-19) բժշկական հակացուցումը հավաստող տեղեկանքը:

  Բժշկական հակացուցումը հավաստող տեղեկանքը տրվում է բժշկական օգնություն և սպասարկում իրականացնող առողջության առաջնային պահպանման կազմակերպության կողմից (պոլիկլինիկա, ամբուլատորիա)՝ համաձայն Առողջապահության նախարարի 2013 թվականի հուլիսի 3-ի թիվ 35-Ն հրամանի պահանջների։

• Ո՞րն է ամբողջական պատվաստումը:

  Ամբողջական պատվաստումը տվյալ պատվաստանյութի կիրառման հրահանգի համաձայն սահմանված դեղաչափերով (դեղաչափով) իրականացված պատվաստումն է: